Assam nung osangbenertemi PM dang security meshir

Guwahati, December 7 (Agencies) : Linük nung osangbenertem tepsetba aser ozüng alema teka sangshiba nung rangloker Assam nung osangbenertemi Centre dang osangbenertem kümzüka ayutsü atema ozüng tesashi ka yanglutsü takhangba agütsüogo.
Journalist Association of Assam-i Prime Minister Narendra Modi nem tezüluba nung takhangba agütsüba nung, Assam nung journalist kümzüka ayutsü atema ozüng ka yanglutsü shia lir.
Tesüiba küm 14 tsüngda Assam nung telungpurtem mesüra police-i tetuyuba agütsüba ama osang mezüluba atema küm shia osangbener ka ka dakbosa kanga mejungi teka sangshiogo, ta parnoki shidi nung shia lir.
“Assam nung ozü züngsemtemi telungpurtem aser ketdangsertemi parnok aginüba ama osang sangdongtsü tetuyuba agütsüba magizüker. Iba tetuyuba sülen manidakba atema züngsem karbo injang ajanga taküm agiogo” ta Kamrup (Metro) Deputy Commissioner ajanga yokba shidi nung shia lir.
“Mapang shia telok balalai reporters, cameramen aser tanga media personnel anema mapa inyaker aser item tatalokba osang agüjaka police-i mapang shitak nung mapa meinyaker mesüra mapang talangka lir ang tatalokba tesem tonga arur” ta PM dangi züluba shidi nungsa shia lir.
Journalist Association of Assam-isa osangbenertem atema medical benefits, life insurance coverage aser pension takhangbatem agütsüogo aser iba den parnoki tang tensa dak rangloker linük nung Media Council ka tentettsü takhangba agütsüsemogo.
Association-isa Assam nung journalists atema railways aser state bus garitem nung ‘full concession’ agütsütsü, housing facility aser talidak maliba journalists nem ali agütsütsü, Wage Board, aser security of services takhangbatem agütsüogo.