Assam nung Raj Babbar-i Cong atema nüboyimtsür

Guwahati, April 01 (Agencies): Assam assembly election nung Congress atema nübo yimtsütsü atema Bollywood actor tejen aser yimtenren lenir, Raj Babbar Assam tonga aruogo.
Raj Babbar-i Assam Pradesh Congress Committee (APCC) Tir, Anjan Dutta’er jala aser Congress candidate, Ankita Dutta atema Amguri Constituency nung nübo yimtsüogo.
Southern cinema actor, Manoj Tiwari-i BJP atema Assam nung anogo asemnü nüboyimtsüba sülen Congress-ia Raj Babbar nem state nung nübo yimdaktsür.
Tanü Raj Babbar-i Amguri constituency nung lokti senden tulu ka nung jembi, iba den külemi iba senden nung motorbike 1000 dak tema anirtemia shilem agia liasü.
BJP sorkar aija Raj Babbar-i, “Nisungtemji khen dang ashioktsütettsü, tanabenbo mashioktsütettsü. Kechi komaka BJP-i tamangba yimsü nung ajemdaker telemsa adokdaktsünüaka parnoki yangibo takok mangutsü, kechiyong Assam ya lokti temeyoktep aika aliba state ka lir. Bihar nung atalokba ama Modi-i Assam nunga ano tamakok ajurutsü,” ta ashi.
Paisa, “Assam ya tepor tajung state ka lir aser ni yang nungi süngo tajung menemteter. Assam, ta asüba olong yagi kü melungjang nung süngu lu imdangi arur. Iba state ya terenlok lenmang nung jajaba ngua ni pelar. Iba terenlok maneni akatsü atema Congress nem tashi agüjang,” ta ashi.
Ano maneni Bollywood actor, Rakhi Sawant-i Republican Party atema nüboyimtsütsü atema kobi melii state-i arutsü.