Assam nung Rangchapara yimtsüng temerüktiba

Guwahati, February 09 (Agencies): Assam nung aliba Goalpara district kübok Rangchapara yimtsüng ya temerüktiba, ta PHED ajanga sangdong.
“Yimtsüng temerüktiba nem agütsüba sempet ya state sorkar aser PHED ajanga tenzük. Iba sentong nung ya district nung aliba yimtsüng ajunga tendanga repranger. Merükmejuba aser Swachh Bharat Abhiyan sentong nung ajemdaker, state nung jana intokba ki yangluba aser moapu nung jana meintoktsü asoshi nüburtem nem tangazükba balala agütsütsü aser ajungshitsü nükjidong nung iba sentong ya tenzük.
Iba sentong nung Dima Hasao nung aliba Zion yimtsüng, Lakhimpur nung aliba Seajuli Bagangaon, Kamrup (Metro) nung aliba Nij Panbari yimtsüng aser West Karbi Anglong nung aliba Shikdamakha yimtsüngtema temaba jenjang nung liasü.
Iba sentong achayanger temi Assam nung yimtsüng 45 repranga senzü. 2017 küm January 17 anogo tashi nung Assam state nung Gaon Panchayat 25, block ka aser yimtsüng 439, state sorkari Open Defecation-Free (ODF) sangdonga lir. February 7 tashi nung Assam nung yimtsüngtem merükmejuba ya shilem 65.21 jungogo aser India nung yimtsüngtem merükmejuba ya shilem 60.24 lir.