Assam nung shiti kati nisung 5 ajemset

Tezpur(Assam), April 5 (Agencies) : Assam kübok Arunachal Pradesh den arrtsüa aliba Biswanath Chariali district nung kinü tanur ka densema kibong ka nungi züngsem pungu tashi arem shiti jati ajemset, ta forest ketdangser kati metetdaktsü.
Thandapani nung züngsem trok aliba kibongji yasüng kilung nung mejanga lia parnok anasa aliba Behali Reserve Forest nung arem shiti ka adoker ki amakdang par pungu ajemset, ta ketdangserisa ashi.
Iba mapang kibong nungjagi arishi küm 3 tain jala ka dang jentet. Tasürtemji Maji Murmu, pa kinungtsü Suny Kimbu, arishi küm 10 tain jala Lakhi Murmu, küm 4 tain jabaso Mohagini Murmu aser anogo 9 nü kinü tanur nungertem liasü.
Iba osang angazükba sülen Mongulbarnep police tonga arua aser mangtem post-mortem atema bener ao.
Tanü All Adivasi Student Association (AASA) aser AATSA nungertemi Behali nung National Highway mokdanger forest department-i yimdaklirtem kümzüka meyutetba atema lungkak ait.