Assam nung shiti tsüksetba ken o tongteper

Guwahati, December 13 (Agencies): Train agi mapang shia shiti tsüksetba dak sendakba nung Assam forest department aser Northeast Frontier Railways (NFR) na tsüngda maneni mangatettep adoka arudar.
State forest minister Pramila Rani Brahma-i Deobarnü ashiba agi, railway gate man-i shiti telok yagi gate raksaa train lenmangi aiba anguba sülena iba tesem anasa aliba station tem nung osang kecha magütsü.
Kasa ken o nung NRF ketdangsertemi-i iba olen nung telangzüba agüja ashiba agi, Forest department puri iba tesem nung shiti senzüba osang tawa parnok tsüngda train lenmang nung shiti tsüksetba nokdangtsü asoshi WhatsApp group ka tentetba nung kecha magütsü. “Gate man sang yagi shiti telok ya anguba mapang nungbo train section tongadoker liasü aser anentsü asoshi tamakoktsü kümadoker liasü, kechiyong train ajungbena anenra derail süla. Train anisang aser pa den yaritepsang nati passenger tem temulung nung yur train indang speed bo tajemba kümdaktsü, saka train ajungbena anendaktsütsü asoshibo tamakoktsü liasü. Iba sülen train yagi shiti telok dak ya atsük aser aser shiti pongu tsükset. WhatsApp group ajanga mapang shidak nung osang agütsü asünungbo onok control room ajanga iba lendong paitoktsü asoshi merangdangla. Iba amala mesükba lendong ya mapang shidak nung osang agütsüba ajanga paidoka aruogo,” ta NFR sangdong ka ajanga metetdaktsü.
Deobarnü anepdang 2:00 ako shi nung Rangapara aser Dhalaibeel stations na tsüngda train kati shiti pongu tsükset.
Mongintemi ashiba agi, nisungtemi talitsü asoshi arem atsünga aoba ajanga chiyongtsü aser tajemtsü tzü agi anünga akümer aser iba ajanga shititem chiyongtsü aser tajemtsü tzü bushia tanga tesemi aoer. Iba ajanga Nisung aser shiti na tsüngda aibaen mangatettep adoker aser iba nung train agi tsüksetba densema lir. Parnok o parnok na tsüngda tongtepa anener tarutsü nung iba amala lendong paidoktsü asoshi sentong ka yanglutsü nüngdaker.
Kasa mapang nung yimtsüng nung shiti temi kiojen raksaja arudar aser aluyimertem alu arutsü mapang nungbo amoa moi anüker.
2005 nungi tang tashi nung Kamrup aser Tinsukia districts na tsüngda nung shiti 100 dak tema tsüksetogo. Guwahati-Naharlagun Donyi Polo Express-i Sonitpur district nung Deobar anepdang shiti pongu tsüksetba ajanga nisung aika aoksadaktsüba dang masü saka iba ajanga mepetmesü adoka kati ka dang tai tongloktsü tenzükogo.