Assam nung Tai oshi benoktsü akhanger

North Lakhimpur, October 28 (Agencies): Assam nung school aser college tem nung Tai oshi benokang ta Tai Ahom Yuva Chatra Sanmilan, Assam (TAYCSA)-i takhangba agütsür.
Hombarnü TAYCSA indang Lakhimpur district committee-i North Lakhimpur nung iba takhangba agüja lungkak ait.
Assam chief minister Sarbananda Sonowal dangi shidi ka züluba nung TAYCSA Lakhimpur unit president Chao Joy Jyoti Gogoi-i Tai oshi nung temulung magütsüba atema jashiba shia lir.
Unicode nung Tai oshi benoktsüla aser Assam curriculum nung primary nungi higher education (university level) tashi iba oshi benoka züngdaktsütsüla ta TAYCSA-i takhangba agütsü.
Taküm September 27 nü TAYCSA-i Madhabdev University, Naryanpur nung vice chancellor dang parnok reju nung Tai oshi benoktsü takhangba agütsüba indang osang Chief Minister dangi züluba shidi nunga shia lir.
Vice Chancellor-i iba takhangba magizükba atema mepelar. Tarutsü anogotem iba atema telangzüba ka mongura lungkak aittsü, ta TAYCSA-isa ashi.
“Assam sorkari Tai oshi ya alakteta agizüktsü akhanger. Yamaji mesüra, onoki lungkak aitba sentong tulu agitsü” ta Gogoi-i ashi.