Assam nung tanü ghonda 12 noktangtsü

Dimapur, April 17 (TYO): All Adivasi Students Association of Assam (AASAA)-i Hombar (April 18) nü ghonda 12 atema Assam noktangtsü ayongzükogo.
April 11, 2016 nü Assam police-i Tinsukia district kübok Pengeri tesem nung nisung 11 tepsetba anema AASAA-i lungkak aita Assam noktangtsü.
Osang ka ajanga ashiba agi, tensaji azüokteta dang lir saka Golaghat, Jorhat, Sibsagar, Dibruagh, Dhemaji, Lakhimpur aser Tinsukia district tem nung lungkak aitba sentongji sashia agitsü akok.
Tetsür ka densema nisung ana tepsetba ken o atema police-i aibelenertem pua marutetba agi taoba Hombarnü nisung telok kati Pengeri police station amakdang police-i injang kahtok, aser idangji nisung 11 tashi taküm sama.
Police-i lungkak aitertem azüoktsü atema injang kahdokdang azüklen electric süngzü ka kahdang aser ibaji ali nung tsüka nisung ishika puseta asü. Iba mapangjisa nisung kar police injang agi asü. Angazükba agi tasürtem teimba ka süngolu ayimer kintem nungi lir.
Ano, Mangkolemba Sub-Divisional Administration-ia sangdong ka nung, Mon, Longleng, Tuensang Mokokchung aser Dimapur nungi senzüsenbongertemi lungkak aitba mapang mesenzütsüi atatsü metetdaktsüogo.