Assam nung tanur 2 teküpbok alir nem dang sorkar mapa agütsütsü

Guwahati, April 9 (Agencies): Assam sorkari Deobarnü ‘draft population policy’ ka metetdaktsüogo aser iba nung kibong ka nung tanur ana dak tema alir nem sorkar mapa magütsütsü aser state nung tetsür nem university jenjang tashi angati züngdaktsütsü indang onüktem dena lir.
“Iba ya ‘draft population policy’ lir. Onoki tanur ana dak tema aliba kibong ka nem sorkar mapa magütsütsü atema tebilemba benokogo” ta Assam Health Minister, Himanta Biswa Sarma-i osangbener dang ashi.
Nisung kar iba telatetba kübok sorkar mapa nung shimokra, pa/la sorkar mapa inyak tashi tanur ana dak tema masotsüla, ta Sarma-isa ashi.
“Tractor aser ki agütsüba, aser tanga government benefits agütsüba employment generation scheme tem nunga tanur ana telatetba alitsü. Maneni, state election commission kübok agiba panchayats, municipal bodies aser autonomous councils elections nunga candidate tem iba telatetba kübok anidaktsü” ta paisa shisem.
Sarma-i Education minister repsema inyaker aser paisa, tetsürtem university jenjang tashi angati züngdaktsütsü, ta metetdaktsü.
“Onoki tetsür kaketshirtem atema ajak angati kümdaktsünür. Fees, transportation, books aser hostel nung mess fee tem ajak angati südaktsünür. Iba inyakyim ajanga school züngtor anenba khuret ajema kümdaktsütsü ama bilemer” ta Sarma-isa shisem.
Sorkari benokba population policy nung tetsür kiyimtsü atema arishi küm telatetji küm 18 nungi tema aser teburtem küm 21 nungi tema asütsü atema onük benoka lir. nisung kar tanur asüdang kibong kümra, pa/la nem sorkar mapa magütsütsü, ta Sarma-isa shisem.
“Tang benokba policy ya ajanga State Population Council aser State Population Research Centre tentettsü atema tebilemba lir. Sorkar mapa aser elections nung tetsür nem shilem 50 lemzüka yutsütsü atema bilemer. Taküm July ita tashi onoki public nungi tebilembatem bendentsü aser iba sülen Assembly nung benoka olemteper telemtetba ka agitsü” ta Himanta Biswa Sarma-isa metetdaktsü.