Assam nung tetsüi lar tanur ana tzüpu nung inoktsü; tepu kati par tanur ana aser teyi tepset

Guwahati, January 31 (Agencies): Assam nung tebu kati teyi, par jala ka aser jabaso ka tepset aser ano tetsü kati lar tanur ana tzübo nung inoktsü.
Assam nung aliba Hojai district nung tanur tetsüi lar tanur arishi küm asem aser ita trok tanur tzübo tejen ka nung inokja südaktsüba ajanga tanur tetsü ya police temi pua lir.
Tanur tetsü, Shahida Begum-i mezüngbo police nem tiyazü kuli agütsü.
Autorickshaw anishir kati lar tanur pua bener ogo, ta lai police dang mezüngbo shia liasü, saka police temi la dang asüngdangyaba mapang kuli bushitetba sülen lai police tem iba tzübo-i anir ao aser iba tzübo nung lar tanur anaji sür lia ngutet.
“Tanur tetsüi iba ama mapa inyakba ajanga onok kanga süngmanger. Iba tetsürlai la sasa soseta asütsü meranga liasü. Iba ken-o bushisüngdangba mapang lir,” ta police temi ashi.
Ano lendong ka nung Bhupen Rai-i Hombar aonung par tanur ana aser teyi tepsetba sülen pa kinungtsü tepsettsü merangba ajanga police temi apu.
Police-i ashiba ajanga, Bhupen Rai-i teyi arishi küm 55 tain, Kamini Rai tepset aser par tanur arishi küm trok, Rajdeep aser jala arishi küm asem, Jyotismita tepset.
Bhupen-i pa kinungtsü Anita tepsettsü merang aser iba mapang par kidangtsür, Shefali Rai aser Dimbeswari Rai ajanga iba rara noktangtsü merangba mapang tena densema yirutsü. Yirur aliba tetsür asem temang tang tajungba lir.
“Iba lendong atalokba sülen, Bhupen-i pai bena aliba nok agi pasasa pa tepsettsü meranga lia par yimertemi nokdanger, hospital-i anir ao,” ta police temi ashi.
January ita tetenzüklen Assam nung aliba Nagaon district nung tetsür kati lar japaso, ita tenet tanur ka tzüpu nung inokja sütaktsüba ajanga police temi pua liasü.