Assam nung tetsür ka tashiyim agi raksatsür 3 apu

Rangiya, October 16 (Agencies): Kamrup district, Assam nung tawa tuang kibong kümli tetsür ka nisung teneti tashiyim agi raksatsüba den külemi kinungbo daka kanga mejungi azük, ta Hokolbar nü police-i ashi.
Brihostibar nikongdang Baksa district nungi kinungtsü o kinungbo na ya Kamrup, Kekenikuchi tesem nung aliba kinungertem den ajuruteptsü asoshi aruba mapang nisung teneti tebuba dak kanga mejungi azük aser iba sülen tetsür laji aremi atsür ia parnok tenet pronglai melentepa tashiyim agi raksatsü, ta Kamrup (Rural) Superintendent of Police Indrani Barua-i ashi.
Iba tatalokba dak sentakba nung FIR ka benokogo aser police-i parnok nisung asembo puogo. Tang pua alir rognung kabo tetsürlar kinunger ka liasü. Tanüngba nisung pezüji aputsü asoshi bushiteptsü tenzükogo.
Tang pua alirtemji Pankaj Das (tetsürlar kinunger), Tilak Das aser Nareshwar Das nunger lir aser jena aortemji Sonmoni Das, Prabhat Das, Satish Das aser Dipak Das nunger lir ta jangjaogo.
Tetsürla ya tasü taküm tsüngda lir aser tang Guwahati Medical College Hospital nung yaridar.