Assam nung tetsürtemi kou ongdoka lungkak ait

Guwahati, September 1 (Agencies): Hokolbarnü Assam nung tetsür 100 shi kati BJP sorkar anema lungkak aitba sentong ka agidang tetsür kari parnok kou ongdok.
Guwahati nung lungkak aitdang tetsür asemi idakjidang parnok kou ongdok aser adenshia alirtem kanga aoksadakja liasü.
“Yangi sorkar tasü lir ta sayutsü atema onoki kou ongdok. Onok nem akhüm agütsür mali” ta Moushumi ta ser kou ongdoker kati ashi.
Tetsürtem ajakji Swadhin Nari Sakti züngsemtem lir aser parnoki Assam nung BJP sorkar anema lungkak ait.
Yaküm election atema nüboyimba mapang BJP-i Assam nung lisopur kintem taginüba, al aser temedentem kümzüka ayutsü ta nangzük. Iba jagi nübortemi parnok dak temulung lema sorkar akümtsü tashi agütsü, saka sorkar akümba sülen nangzükba ama meinyaker, ta tetsürtemi ashi.
Sarbananda Sonowal-i aniba BJP sorkari lisopur nem agütsütsü melena bendanger nem ang mapatem agütsü aser benjungbentsü nung sen aika endoker. Talisa, tzümetsüng mapang sorkari nübortem teyari tim meyari, ta parnokisa metetdaktsü.
“Ozü Chief Minister ji Delhi nung high command pur peladaktsütsü atema dang kanga mazünger. Pai nübortem khuret aser tebilemtsütem atema bilemtsü mapang mali. Onoki lungkak aitba ajanga sorkar mulungsentsü nung kongshitsü onoki imlar” ta parnokisa shisem.