Assam nung ‘Two-child norm’ takangba kümdaktsütsü

Guwahati, May 04 (Agencies): Assam kübok kibong ka nung tanur ana dang asotsü asoshi Assam sorkari tang temzüng ‘draft’ süa aliba nung MLA aser MP tem aibelenra pa/la menden nungi aludaktsütsü asoshi Centre dang asüngdangtsü, ta Health & Family Welfare Minister, Himanta Biswa Sarma-i Brehostibarnü ashi.
“Family Planning indang ozüng nung MLA temia anidaktsü asoshi Centre den jembitsü. ‘Two-child norm’ ya ajanga State Legislature inyaktsü jangrartem nem tazüokba agütsütsü,” ta Sarma-i Guwahati nung osangbenertem den senden ka akaba mapang ashi.
“MLA temi iba telatet nung aibelenra pa/la election nung tokteptsü memelatsü,” ta paisa shisem.
Nütsüng züinba tajemba kümdaktsütsü mechi kibong ka nung tanur ana dang asotsü ozüng ka Assam sorkari yanglua lir.
Iba temzüng ya anu tatem küma merenem saka iba temzüng ya sorkari agizüka ayuba sülen nüburtemi iba temzüng nung aibelenra sorkar indang teyari aser mapa bushiba nung metemsüi akümtsü.
Tanur ana dak tali aliba kibongtem nungi panchayat aser iba amala sapang nung shilem magitettsü, ta iba temzüng nung inoka lir.
“Iba sentong ya state sorkar website nung March ita inoktsüogo aser nüburtem tangatetba reprangdangtsü. Tang tashi nung email 88, social network ajanga suggestion 600 aser article 37 onok dangi media ajanga arua lir. Item onüktem nung ajemdaker tanabuba aser tatempangba ‘population policy’ yangluogo. Iba policy tasenba dang ‘Draft Population & Women Empowerment Policy of Assam’ ta nüngja agütsüogo” ta Sarma-i ashi.
Saka jakrep aser tanur asem asortem bo iba ozüng-i malentsü.
Tetsürtem temeden wazüka ayutsü asoshi temzüng aser ozüng reprangshitsü, ta minister-isa shisem.
“Tetsürtem temeden anema mapa tamajung inyaker merenshitsü asoshi ozüng tesashiba yanglushitsü. Sorkari renema aliba küm madongdang kibong akümba, tashiyim agi raksatsüba aser kidang kibong nung tetsürtem dak züka merenshiba azüoktsü asoshi ozüng tesashiba yanglutsü,” ta Sarma-isa ashi.
Kinungbu sür aliba tetsürtem nem pension agütsütsü, balalular aliba aser kicha aliba tetsürtem nem teyari agütsütsü sentong inoksemtsü aser iba policy tasenba ya Assam sorkari August ita state assembly nung lemtettsü.