Assam nung tzümetsüng ajanga maneni nisung lakh 3.5 dak kongshir lir

Guwahati, July 4 (Agencies): Assam nung tzümetsüng agi nüburtem maneni kangshidar. District 13 tashi nung nisung lakh 3.5 shi tzümetsüng agi kongshir lir, ta Disaster Management Authority ajanga Mongolbarnü metetdaktsü.
Tesem ajak rongnungi Karimganj district nung iba lendong tamajungba kümdar. Tang tashi nung iba tesem nung yimtsüng 200 dak tema tzü agi metsüngbanger lir aser nisung lakh 2 shi dak kongshir kangshidar.
Lakhimpur, Golaghat, Jorhat, Cachar, Dhemaji, Biswanath, Karimganj, Sonitpur, Darrang, Hojai, Majuli, Barpeta aser Nagaon district tem nung yimtsüng 740 dak tema tzümetsüng agi kongshir lir.
Lakhimpur nunga yimtsüng 150 shi tzümetsüng agi kongshiogo aser nisung lakh ka shi teyari kecha monguteti kangshidar.
State nung alu hectares 14,884 nung tsünüsenpongtsü yoker aliba tzümetsüng ajanga raksatsüogo.
Alu kanga mejungi kongshiba tem timba ka Jorhat aser Dhemaji district nung lir, ta ketdangsertemi metetdaktsü.
Tzümetsüng ajanga maneni Majuli, Biswanath, Darrang, Karimganj aser tanga tesem tem nung infrastructure tem raksatsüba ajanga lenmang, apu nung kongshiogo aser senzüsenpong mesademi kümogo.
Ketdangsertemi relief aser rescue operation tem tali akangshia inyak tenzükogo. Tang tashi nung district balala nung relief camp tem 145 lapokogo aser idakji nisung 21,000 shi lidar.