Assam nung tzümetsüng ajanga nisung 39,000 talidak makai kümogo

Guwahati (Assam), July 07 (Agencies): Assam nung tzümetsüng agi district 14 kongshia lir aser iba ya ajanga tang tashi nung nisung 39,753 kongshiogo.
Tzümetsüng agi kongshiba district temji- Lakhimpur, Jorhat, Golaghat, Sivasagar, Cachar, Dhemaji, Biswanath, Karimganj, Sonitpur, Hojai, Majuli, Barpeta, Chirang, Nagaon aser Nalbari district tem lir.
Brihostibarnüa tzümetsüng ajanga tanur asem süogo, aser ibaji densemabo state nung nisung ajak agi 24 süogo.
Iba tensa ya ajanga state sorkari relief camps 128 yangluogo aser Chief Minister Sarbananda Sonowal leniba nung iba tensa mita reprangdar.
July 5, 2017 nü tzümetsüng agi district 13 nung nisung lakh pezü kongshia liasü, ta ketdangsertem osang ka ajanga metetdaktsü.
Ano tzümetsüng agisa Kaziranga national park nung nemzüka aliba tesemtem kongshia lir, iba den külemi ayong aika nung tzü tali metsünga yimdar.
Tzümetsüngba ajanga Guwahati aser North Guwahati tsüngda rong senzüba nokdanga lir, kechyiong Brahmaputra nung tzü tali metsünga ayimer. State Disaster Response Force (SDRF)-i Nalbari district nung tang tashi nung kaketshir 400 aienshidaktsüogo.
July 03, 2017 nü tzümetsüng ajanga Lakhimpur district nung nisung ka asü. Karimganj, Lakhimpur, Golaghat district tem tamajungba kongshia lir.
Tang nisung 24,000 shi relief camps 108 nung jenoka lir aser parnok nem tzü aser jang densema teyari balala agütsüdar.
Tzümetsüng ajanga kiojen dang masü saka kiset shiruru, gari lenmang aser alu ayimba li aika kongshiogo.