Assam nung tzümetsüng ajanga nisung 40,000 tema timtemer

Guwahati, April 24 (Agencies) : Taoba hopta ka tsüngda tzünglu kanga aruba ajanga Assam kübok tesem aika tzü agi metsüngbangogo aser iba ajanga nisung 40,000 den timba timtemer, ta Deobarnü ketdangsertemi metetdaktsü.
District pezü- Lakhimpur, Jorhat, Sivsagar aser Charaideo nung tzümetsüng timtem lir aser nisung 42,658 tashi timtemer, ta Assam State Disaster Management Authority (ASDMA)-i metetdaktsü.
Chairaideo tesem nung tzümetsüng agi taolen makai aliba nisungtem kümzüktsü atema Army, National Disaster Response Force aser State Disaster Response Force temi yaritepdar, ta ASDMA-isa metetdaktsü.
Tanü Guwahati nungi Assam Chief Secretary, V.K. Pipersenia-i ketdangsertem aser deputy commissioner ajak den video conferencing ajanga tzümetsüng dak sendakba osangtsüsang metetpelaogo.
Pipersenia-i, ketdangsertem dang tzümetsüng timtem jungjunga reprangtsü tetuyuba agütsü aser health & family welfare department dena department balalai tzümetsüng lendong atema renema aliba maparen reprangshim.
Barak Valley nung Hailakandi anasa Panchgram nung NH-53 raksaa alibaji Water resources department, PWD (national highways division) aser National Highways Authority of India nungertemi külemi tesem tonga oa repranga yanglutsü atema Assam chief secretary-isa tetuyuba agütsü.
Dibrugarh district kübok Burhidehing ayong aser Sivasagar district kübok Desang ayong nung tzü mesemi ayimer, ta Central Water Commission-ia osang metetdaktsü.
Guwahati nung aliba Regional Meteorological Centre-i ashiba agi, Hombar sülen nungi tsüngsang tajungba akümtsü.
Tzünglu tesashi aruba aser anentsüh aluba ajanga Honibar aonung Lumding nung New Delhi-Silchar Poorvottar Sampark Kranti Express timtem ajuru.
Tzünglu kanga aruba ajanga tesem aika nung anentsüh alua train lenmang noktanga lir. Yasüng atalokba lendong nung nisung shinga yiruyibong masü aser train ji tanep apusogo, ta Northeast Frontier Railway (NFR) otongdar kati ashi.
NFR kübok Lumding-Silchar hill section nung passenger train tem mesenzütsü atema noktanga lir. Tsüngsang tajungba kümra aser train lenmang anenbanga aliba lapoktetra asüng nungi passenger train tem senzütsü akok, ta NFR otongdar tongti, PJ Sharma-i tanü osangbenertem dang ashi.