Assam nung tzümetsüng ajanga nisung lakh ka shi dak kongshiogo

Guwahati, June 7 (Agencies): Assam kübok Lakhimpur aser Karimganj district nung alir nisung lakh ka dak tali tzümetsüng agi kongshia kangshidar. Kasa mapang nung state nung ayong pezü lendong temaitsü agütsüba adena atur yimdar.
Assam State Disaster Management Authority (ASDMA) ajanga ashiba agi, district ana nung nisung 1,01,809 tzümetsüng agi kongshir kangshidar aser yimtsüng 140 tzü agi metsüngbanger lir.
Tzümetsüng ajanga ali hectar 385.67 nung adoka aliba tsünüsempongtsütem raksatsüogo
District ana rongnung Karimganj, tzümetsüng ajang kanga mejungi kongshiogo aser idakji aliba nisung 97,000 dak tali kangshidar. Kasa mapang nung Lakhimpur district nung tzümetsüng ajanga nisung 4,500 dak tali kongshiogo, ta osang ajanga metetdaktsü.
Ketdangsertemi relief camp ka lapoker lir aser idakji nisung 113 jenoka lir. Maneni ketdangsertemi relief agütsüba tesem 130 lapokogo.
Golaghat kübok Numaligarh tesem nung Dhansiri ayong lendong temaitsü agüja aliba adena atur yimdar yamaji ano Karimganj kübok Badarpurghat nung Barak ayong, Matizuri kübok Hailakandi tesem nung Katakhal ayong aser Karimganj jila nung Kushiyara ayong ta lendong temaitsü agüja aliba adena atur yimdar, ta kasa osang ajanga metetdaktsü.