Assam nung tzümetsüng tensa tamajungba kümshir

Guwahati, Chiteni/July 7 (Agencies): Assam nung tzümetsüng tensa tamajungba akümer aser Rogonü tashi nung lower Assam kübok district tangatem nunga tzümetsüng arua nisung 51,000 shi dak kongshiogo.
Assam State Disaster Management Authority (ASDMA) sangdong ka ajanga ashiba agi, Nalbari, Barpeta, Chirang, Sonitpur, Lakhimpur, Dhemaji aser Majuli districts kübok yimtsüng 85 nung alir parnok 51,402 tzümetsüng agi kongshir kangshidar. Yangtepnü tashi nung nisung 45000 shi iba lendong ajanga kongshir liasü. Tsünüsempongtsü tsünüba ali hectar 3,743.30 maneni tzü agi metsüngbanger lir. ASDMA sangdong ajangasa ashiba agi, Jorhat district, Nematighat tesem kübok Brahmaputra ayong aser Sonitpur district kübok North Trunk Road nung Jia Bharali ayong lendong temaitsü agütsür aliba adena atur yimdaki.
Tzümetsüng agi kongshiba district tem rongnung maneni Lakhimpur ya ajak dang nungi tamajungba kongshir lir aser idakji alir nisung parnok 21,894 kangshidar. Tang tashi nung relief camps 21 nung nisung 1,500 shi jenoka lir. Yangtepnü tashi nung Lakhimpur, Chirang aser Kokrajhar district tem kübok relief camp tem nung nisung 548 dang jenoker liasü.
Taoba ita nungi tang tashi nung tanur 15 densema nisung 32 süogo. Kasa mapang nung Biswanath, Chirang aser Morigaon district tem kübok ali anenba ajanga nüburtem mesüngjemteti lir. Ketdangsertemi ashiba agi, Biswanath district kübok anogoshia ali meter 20 shi anenzüka bener aoer. Ali anenba ajanga Chirang district kübok Aie Poaliand aser Burijhar yimtsüng lendongbang nung toktsüogo aser Morigaon district nung Khandajan aser Basanghat yimtsüng ali anenzüka bener aoba ajanga kongshir lir.
Kasa mapang nung Union ministry, home affairs sangdong ka ajanga ashiba agi, National Disaster Response Force (NDRF) personal parnok 1,384, Arunachal Pradesh, Assam, Sikkim aser Tripura densema tzümetsüng agi kongshir aliba state 14-i yokogo.