Assam nung tzümetsüng timtem tamajungba akümer

Guwahati, July 9 (Agencies): Deobarnü Assam nung tzümetsüng lendong nung nisung ka asü aser ibaji züngsema taküm tasür ajak agi nisung 26 jungogo.
Assam kübok district 15 nung nisung lakh 5 shi tzümetsüng ajanga timtemdar. Tanü Karimganj district nung nisung ka tzü nung arakset, ta Assam State Disaster Management Authority (ASDMA)-i osang metetdaktsü.
Taküm tzümetsüng timtem ajanga Assam nung nisung 26 tashi taküm samaogo aser Lakhimpur, Jorhat, Golaghat, Cachar, Dhemaji, Biswanath, Karimganj, Sonitpur, Majuli, Barpeta, Nagaon, Nalbari, Sivasagar, Morigaon o Chirang district tem nung nisung lakh 4.87 shi timtemer, ta ASDMA-isa metetdaktsü.
Ketdangsertemi district 10 nung relief camps aser distribution centres 181 lapokogo aser tang tashi nung nisung 17,744 jenoka lir, ta parnokisa shisem.
Deobarnü Prime Minister Narendra Modi-i Assam Chief Minister Sarbananda Sonowal den phone ajanga tzümetsüng indang tensa osang metetpelaogo.
Assam sorkari timtemertem den yaritepba, tzümetsüng ajanga teraksa bener arutsüba aser relief & rescue maparen indang Modi-i Sonowal den metetpela.
Centre sorkari Assam nung tzümetsüng aser ali anenzükba timtem khuret süa bilemer aser akokba tashi yariteptsü, ta Modi-i Chief Minister dang nangzük.
State sorkari timtemertem yaridar aser Cabinet nung minister tem osang tejangja metettsü atema tzümetsüng ajuruba tesemtemi yokogo aser relief & rescue maparen inyakdar, ta Sonowal-i PM dang ashi.
Assam nung tzümetsüng aliba tesemtem nungi MP aser MLA tem pei pei constituency nungdang alitsü aser rescue & relief maparen ketdangsüa inyaktsü atema tetuyuba agütsüogo, ta paisa shisem.
“Sorkari district administration ajak dang tzümetsüng timtem koktettsü atema renema atatsü metetdaktsüogo. Talidak toktsür aoertem jenoktsü atema relief camp tem lapoka lir aser osettsüsettem lema agütsüogo. Tzümetsüng ajanga taküm samaba kibongtem nem ghonda 48 tsüngda teyari agütsür” ta Sonowal-i Modi dang ashi.
Ano, Animal Husbandry & Veterinary Department-i State Disaster Response Fund (SDRF), den yaritepa shirurutem kümzüktsü atema mapa inyakdar, ta paisa shisem.
Agriculture Department-ia tzümetsüng ajanga tsünüsenbongtsü akoksaba aluyimertem nem metsü tajung agütsür. Public Works Department-ia gari lenmangtem raksaa aliba yanglushidar aser Water Resources Department-ia anentsüh alu aliba tesemtem nung mapa inyakdar, ta Assam chief minister-isa PM dang metetdaktsü.