Assam nung ULFA-i amakdang army 3 pokset, 4 yiru

Guwahati (Assam), November 19 (Agencies): Honibarnü Assam, Tinsukia district kübok Digboi tesem nung improvised explosive device (IED) ka apokba lendong nung sepai asem pokset aser pezü kanga mejungi yiruogo.
Tanü Defence Public Relations Officer, Lt. Col. Suneet Newton-i, “Parnoki (telungpur) lenmang nungji IED ka rema toktsü. IED ji apokdang convoy ji anen. Iba sülen telungpurtemi injang sashia kahloktsü,” ta metetdaktsü.
Iba tesem nung alirtemi ashiba agi, telungpurtem jagi gari lenmang tip anatsülen nungi injang kahloktsü.
Iba osang angashia Union Home Minister, Rajnath Singh-i Assam Chief Minister, Sarbananda Sonowal den iba tatalokba osang metetpelaba sülen Singh-i, Ministry of Home Affairs (MHA)-i iba tensa mita reprangdar, ta metetdaktsü.
Tanep 5:30 ako meta Guwahati nungi kilometer 550 shi pilar aliba Tinsukia nung Pengeri reserve forest anasa United Liberation Front of Assam (Independent) teloki Army convoy ka mendanger amak.
Osangbener den jembidang Assam additional police tongti, Mukesh Agarwalla-i, “ULFA telungpurtemi ‘rocket-propelled grenades’ agi army convoy amakdang truck ka aser jeep ka dak kongshi. Iba amakba nung sepai asem asü aser pezü mejungi yiru,” ta metetdaktsü.
Ketdangsertemi ashiba agi, yirua alirtemi zübo aika keter tayimtsü ajanga anasa aliba Army hospital kati anir ao.
“Iba tesemji arem-min asüba ajanga telungpur tem jagi maakli jena otet,” ta Army commander kati ashi.
Iba tatalokba sülen Army, police aser paramilitary sepaitemi telungpurtem mita bushi tenzükogo, ta army ketdangser kati ashi.
2011 küm ULFA-i, parnoki India sorkar den yimjung ken o jembitsü ta sangdonga liasü. Ano National Democratic Front of Bodoland (NDFB) telok katia India sorkar den ceasefire tezüngzüktep agitsü mulung.
Iba mapang nungjagi tenzüka telok anaprong nungi iba telemtetba anemertemi state nung bomb aser grenade amshia amaker, ta police ketdangsertemi ashi.