Assam nung yimtaklirtemi lenmang kilometer 6 yanglu

Guwahati, December 22 (Agencies) : Sorkar nungi teyari aiben meshir magütsüba ajanga Assam nung Dima Hasao district kübok Boro Robi yimtaklirtemi parnok sasa lenmang kilometer 6 yanglua alima den tesendaktep yangluogo.
Küm ishika administration dang iba lenmang yanglutsü asoshi mepeshia aru, saka kecha telangzüba magütsüba ajanga par yimertemi Social entrepreneur Aching Zeme tang lenmang sayutsü asüngdang.
“Yimtaklirtemi iba lenmang yanglutsü asoshi teyari meshia sorkar dang aiben asüngdanga liasü, saka telangzüba tajung kecha mangu. Anungji parnoki iba lenmang yanglutsü asoshi teyari lenmang kar bushia kü dangi aru. Mezüngbo ni kanga aoksa aser süngmanga liasü. Saka parnok timtemba ngua ni mapa kar inyaktsü mulungtet,” ta Zeme-i PTI osangbener tang ashi.
Mezüngbuba nung iba lenmang asameyang sür, gari senzütettsüsa MGNREGA scheme ajanga yanglua aliba Zaikang yim den sendaktepa yanglutsü tenzük.
“Iba lenmang tasazük kilometer trok shi lir. Boro Robihad yimtak nungi Jatinga tsütsüi aodang tenem ka ajanga senzü. Anungji onoki senzüsemponger timtem meli senzütsü asoshi gari senzütettsüsa lenmang ka yanglutsü lemtet,” ta Zeme-i ashi.
Iba mapa tenzüktsü asoshi yimer dang sen 20,000 meshi.
“Ni sen 60,000 tenla aser sen 80,000 agi iba mapa tenzük. Iba lenmang yanglutsü asoshi sen lakh 1.5 nüngdaka liasü. Anungji onoki metemer aser temulunger dang tenla meshiba nungi sen 40,000 aru. Ano lijaliyongba sen 20,000 magütsüi lir,” ta Zeme-i sa ashi.
India tesem balala nungi tang masü saka bendang lima tesem balala nungi tenla aru, ta paisa ashi.
Iba lenmang November 26 nungi yanglu tenzük aser tan hopta renemogo. Dima Hasao nung yimtsüng 30 shi lenmang mali.
“Telangzüba kecha meliaka onoki sorkar dang aiben iba lenmang yanglutsü asoshi asüngtangogo. Onoki maneni asüngdangtsü. Sorkar-i kecha meinyakra onoki Boro Robi sülen ano maneni inyaktsü,” ta Zeme-i ashi.
Electricity tsütsülena kanga tezütangtsüka lir. Dima Hasao district nung shilem 30, yimtsüng 25-30 nung electricity mali.
“Electricity inoktsütsü asoshi onoki sorkar dang asüngdang. Yimtsüng kar nungbo tawa electricity inoktsüogo,” ta paisa shisem.
Local level nung iba ama mapa inyakba onoki angashiogo, ta District administration intang odongtar-i shia liasü.