Assam nunger li shinga nema magütsütsü: Assam Angh Mukhi

Guwahati, November 02 (Agencies): Tang NSCN (IM) aser Central sorkar na tsüngda Naga yimtenren ken o latettsü atema jembiba mapang ka nung Assam nüburtemi state meyong litsü karbo Greater Nagalim nung adentsü südi ta tsübutepba mapang ka nung Assam Angh, Jagdish Mukhi-i, Assam nunger litsü tera kata tanga state shinga nem magütsütsü, ta metetdaktsü.
Bodhbarnü Guwahati nung osangbenertem senden ka nung Greater Nagalim nung Assam litsü-a terabao adentsü südi ta nisungtemi arendaka tsübuba dak sendakba tasüngdangba ka langzüdang Angh-i, “Tetsübu malitsüla. Assam nunger li tanga state shinga nema magütsütsü,” ta metetdaktsü.
Mukhi-i, nüburtem timtem balala atema o lemteptsü asoshi pai shisalemsatepba sentong aika tenzüktsüogo, aser pai state nung district ajak sema senzütsü, ta metetdaktsü.
Bodhbarnü Mukhi-i Morigaon district semdanga liasü aser iba mapang nung pai district ketdangsertem den sorkari benokba scheme balala inyakba onük nung o lemtepa liasü.
Ano Nagaon district nunga Angh-i Swachhata Abhiyan sentong nung shilem agi aser Mahatma Gandhi kürakyanglu semdanga asür nem akhüm agüja liasü.
Paisa nüburtem dang, pei taküm libaliro nung merükmejuba dang masü saka temelungjang-a merükteta alitsüla, ta ayongzük.