Assam nungi anir aoba tetsür tanurtem anir arutsü meranger

Guwahati, September 27 (Agencies) : Gujarat aser Patiala nung aliba orphanage nung ayutsü atema Assam nungi tetsür tanur 31 ozüng alema anir aoba meyiba anir arutsü atema CID dang nungi teyari meshir, ta Assam State Commission for Protection of Child Rights(ASCPCR)-i metetdaktsü.
Assam nung tilatanur nem nüngdakba teyari magütsüteter ta nisung shibelenertemi Gujarat media dang tiyazü sangoktsü, ta Commission chairperson Runumi Gogoi-i osangbener dang ashi.
Ita ana tejaklen arishi küm 12 teküpok tetsür tanur 31 tashi BTAD aser iba temeket nung aliba tesemtem nungi tantsür anati anir ao. Tena ya tamangba yimsü dak sendakba telok ka nung züngsem asütsü amai temulung melemi bilemer, ta Runumi Gogoi-isa ashi.
Honibar nungi tenzükba child rights shisatokden sentong ka nung o jembidang Runumi-i iba osang metetdaktsü. Tanurtem meyipa anir arutsü atema CID dang nungi teyari meshiogo ta laisa shisem.
“Tanurtem shibelenba maparen nung nung teyariteper lir. Tetsür tanurtem odangba state adena anir moutet. Ozüng alema mapa inyaksangshir” ta Runumi-isa ashi.
Tanurtem New Delhi leni anir aodang nisung kari angu aser NGO Child Line nem osang sangoktsü. Ajisüaka, Child Line-i mapa meinyak tsüngda tantsür ana jagi tanurtem anir oadok, ta laisa metetdaktsü.
“Tanurtemji telok ana lemsa aser nisung 20 züngsemba telokji Gujarat aser 11 ji Patiala-i yok” ta Runumi-isa ashi.
Tanurtem kümzükba atema mapa inyakdang sentsü alir kari ibaji noktangtsü merang. Tantsür ana jagi tanur tsüraburtem aser yimtsüng nung lennirtem dang nungi kulikaket agütsüba sayu ta ni angazükogo, ta laisa metetdaktsü.