Assam nungi Kachari nungertemi Rilan lushi atsünga agir

Dimapur, August 11 (TYO) : Karbi Anglong district kübok alir Kachari nungertemi Assam police teyari agia Dimapur district kübok Rilan yimtsüng lushi atsünga agir, ta Rilan Village Council aser Lotha Core Committee nati sangdong ka nung metetdaktsü.
Dimapur kübok Rilan yimtsüng nung Kachari nungertemi ali atsünga agir aser Rilan yimtsüng telongtet nunga parnoki sign board ka yua lir, ta Rilan Village Council Chairman, Nribemo Ovung aser Lotha Core Committee Chairman, Chonthungo Lotha nati külem sangdong nung shia lir.
Assam nung Karbi Anglong district kübok Kachari nungertemi Assam police teyari agia tawa tu Rilan nunger lushi nung Disapur Village, Assam Gate. Dhansiri, Karbi Anglong, Assam ta ser yim ka ozüng anema kümtetogo, ta tenatisa ashi.
Assam nungi Kachari nungertemi iba mapa inyakba ya Rilan Village Council aser Lotha Core Committee nati süoki ia bilemer aser Assam o Nagaland sorkartemi tekaratiba nung ozüng anema kümtetba yimji agientsüla, ta ketdangsertemi sangdong nung shia lir.
Iba khuret atema aiben Nagaland sorkar dangi osang benogo saka parnoki mapa kecha meinyak. Kodangsa Rilan yimtsüng nung terenlok mapa inyakdir, idangji Nagaland sorkari 144 CrPC ozüng agütsür noktanger. Ajisüaka, Assam kübok Kachari nungertemi Nagaland lushi atsünga agidangbo sorkari kecha mashir, ta RVC Chairman aser LCC Chairman nati sangdong nung metetdaktsü.
(Maneni tapak 9 nung…)