Assam nungi MBA student ka Puducherry nung asü

Guwahati, September 1 (Agencies): Pondicherry University nung MBA student Assam nunger Sashikant Borha Blue Whale online game ajanga asü ta police-i tanü metetdaktsü.
Arishi küm 20 tain Borha ji Brihostibar aonung university hostel campus nung aliba süngdong ka nung alenseter lia angu. Iba ya Blue Whale game ajanga asütsü akok ta police-i temulung melemi bilemba agi parnoki Borha indang mobile phone aser laptop sota lir.
Tesüiba hopta ka shi Borha-i nisung shinga dena sensaksem masü aser mobile phone dang amshi, ta par college medemertemi ashi.
Borha-isa Assam nung par medemer kar dang Blue Whale game asayatsü jaoka liasü, ta college medemer katisa ashi.
Külen, Madras High Court nung Madurai bench-i September 4 nü Blue Whale game indang ken o ka angadangtsü.
Bodbarnü college student ka Madurai nung asüba sülen advocate kati iba game ya nokdangtsüla ta okadak ken o benok.
Arishi küm 19 tain Vignesh ji Tamil Nadu nung Blue Whale online game ajanga asür mezüngbuba liasü aser pa teka nung blue whale noksa ka yanglua liasü.