Assam Police-i ASI & GSI dang arrtsü indang kuli meshir

Guwahati, Chiteni (July) 7 (Agencies): Assam aser kidanger state tem den mapang talangka arrtsü mangatettep ken o tem angatetteptsü atema Assam Police-i Archeological Survey of India (ASI) aser Geological Survey of India (GSI) dang nungi ‘historical proof’ meshiogo.
Assam aser kidanger state tem dak sendakba litsü osang, relics (maidams) aser kakettem agüjang ta Assam Police Border Organization (APBO)-i ASI aser GSI dangi shiditem züluogo.
“Kümtem süia arudang akhidang nungi inyaka aruba mapatem melenshiba bushitetogo. Nisung ajaki mulunga agizükba inyakyimtem liasü aser tang onoki item inyakyim tenzükdangtsü meranger. Putiotsü meyipa reprangshiba ajanga Assam den kidanger state tem den angatetteptsü ta onok bilemer” ta Assam Police-i metetdaktsü.
“Onoki putiotsü indang kuli aliba data ajak meshiogo aser talisa ASI o GSI nungi anguba kuli dak tamang katettsü aser ajaki agizüktettsü” ta parnokisa ashi.
Assam State sorkari Nagaland mesüra arrtsüa aliba tanga state ajak den yimjung nung linür aser arrtsülen ozüng alema mapa inyakba anendaktsünür, ta osang ka ajanga ashi.
“Onoki revenue department dang inter-State arrtsü dak sendakba records meshitsü aser itemji tanga kulitem den bendenloktsü” ta APBO-isa metetdaktsü.
Border Police ajanga ashiba agi Assam-i Meghalaya den kilometer 884.90, Arunachal Pradesh den kilometer 804.10 aser Nagaland den kilometer 512.10 agi arrtsüa lir
Assam aser Meghalaya tsüngda arrtsüji 512.10 lir, Manipur den kilometer 2014, Mizoram den 164.60 aser Tripura den kilometre 46.30 lir ta parnoki metetdaktsüogo.
“Arrtsü ajak dang nungi Assam-Nagaland arrtsü nung metepmesü teimba adoker. Mangatettep ajanga arrtsü anatsülen nisung takümtem samaogo. Iba ken o Supreme Court nung benoka lir, saka onoki tanga lenmang ka ajanga teti atema telemtetba tajung ka agitsü meranger” ta Assam Police ketdangser kati ashi.