Assam Police-i Doyang nung NEEPCO ketdangser apu

Guwahati, Luroi (August) 4 (Agencies): Assam Police-i Nagaland Police den yaritepa NEEPCO -Doyang River Project nung Chief Project Officer, Priyabrata Das puogo.
Assam-Nagaland arrtsü anasa DSP Partha Saikia-i anir special police team kati Das apu aser pa Golaghat-i anir odar ta osang ajanga ashi.
Khumtai nungi BJP MLA Mrinal Saikia-i Hokolbarnü North Eastern Electric Power Corporation Ltd (NEEPCO) ketdangser Das anema FIR ka benok aser paia Golaghat nung osangbener den jembidang Das apuba osang jangjatsüogo.
FIR nung ajemdaker Golaghat Police-i ken o ka benok. FIR nungji Saikia-i “Chiteni (July) 27, 2018 nü NEEPCO-i ketdangsüa inyakba Doyang Hydro-electric Project-i Golaghat district administration mesüra state sorkar nem osang kecha mesangoktsüi tzünokdang nungi tzü talila chiokba ajanga Dhansiri aser Doyang nung tzü mesemi ayim aser tzümetsüng timtem adokdaktsütsü” ta shia lir.
“Iba tzümetsüng lendong ajanga tang tashi nung yimtsüng 90 mobanga lir aser ali tasazük hectare 2085 nung tsünüsenbongtsü raksatsüogo aser nisung meyirjang aika talidak maka kümogo. Lendong nung nisung asem asü” ta BJP MLA Saikia-isa FIR nung shia lir.
Golaghat district kübok yimtsüng/localities 99 tashi tzü agi metsüngbanga lir. Tesemtemji Sarupathar nung 12, Merapani nung 12, Morongi nung 19, Khumtai nung 14, Golghat nung 12, Bokakhat nung 23 aser arrtsülen (Sector B) nung 7 lir.
Saikia-isa Gauhati High Court nung NEEPCO anema writ petition ka benoktsü atema sentong lir.