Assam Police-i ozüng alema inyakba mapa inyaker

North Lakhimpur, July 29 (Agencies): Guwahati kübok Hatigaon police station nung sub-inspector John Pathori den police ana apuba ajanga Assam Police-i taila sen aser hon shibelenba inyakyim den tesentaktep aliba putetogo.
Taoba mapang John Pathori ya Bangalmora Police Outpost, Lakhimpur nung inspector-in-charge ama inyaka liasü aser iba tesem nung ozüng alema item mapa inyaker.
John den külemi apuba home guard Bipul Hazarika ya taoba mapang Bangalmora Police Outpost nung mapa lemzüka liasü.
Lakhimpur nung police-i ozüng alema inyakertem kar nübo amshia tangalen nungi taila sen aser taila hon alitsü mesür.
Lakhimpur district nung Nowboicha LAC kübok Bangalmora nung telok tilapur ka alir aser parnoki ozüng alema mapa inyaker.
Iba jagi police-i parnok teyari agia parnok sen angutsü lenmang bushir. Ajisüaka, asangsang nungbo iba tesem nung taila sen aser hon industry kecha lapoka mali.
Police akhüm kübok ozüng alema mapa inyakertemi taila sen aser taila hon alitsü customer tem anir arur.
Parnoki customers dang sen menüngba machine ta sayur saka shitakba nungbo itemji teka agi yangluba süngdentem dang lir aser telung nung shitakba sen kar enoka lir.
Customers-i machine ji shitakba ta bilemer aser taila sen yanglutsü atema chichiba sen aika agütsür. Idangji tayokertemi senji bener ajener aser customer tem ashioktsür.
Customers-i police dang oa ken o mebenokteter kechiyong ibaji ozüng alema inyakba mapa ka lir aser parnok dak tai tongloktsütsü tsübur. Iba maparen ya Bangalmora nung mapang talangka inyaka arur.
Bangalmora area nung mapang shia police-i sen menüngba mesüra tanga osettem menüngba machines apur, saka Abu Sayed, Abdul Razzak, Nabiul, Zakir ama ozüng alema mapa inyaker tetsüditemi mapa inyaker aser parnoki police-i kümzüka ayur.
Iba tesem nung küm 15 tema iba maparen inyaka arur aser Bihpuria o Laluk Police station aser ano Bangalmora, Harmutty, Banderdewa aser Dolahat outposts nung police-i iba maparen samatsütsü atema kecha meinyaker.
Bangalmora tesem nung alirtemibo iba ozüng alema inyakba mapa ya police-i inyaker ta tai tongloktsür.