Assam polling station ajak nung VVPAT alitsü

Guwahati, February 28 (Agencies): Taruba Lok Sabha elections mapang Assam kübok polling station ajak nung Voter Verifiable Paper Audit Trail (VVPAT) system alitsü ta Chief Electoral Officer (CEO) Mukesh Chandra Sahu-i ashi.
Polling stations kar nung EVM nung vote enokba den külemi VVPAT slips densema azüngtsü, ta pai ashi.
VVPAT device ya Electronic Voting Machines (EVM) den sendaktepba printer ka lir aser iba ajanga party candidate tenüng aser party indang maitsü menüngzüker.
VVPAT devices ajanga vote agütsürtemi peii vote enoktsüba jangjateter aser election nung ochimashi inyakba mesüra machine mapa meinyakba puteter.
VVPAT device amshiyim indang awareness campaign tenzükogo aser nisungtemi iba machine amshitettsü atema mock voting nung shilem agir, ta Sahu-isa ashi.
Assam kübok district aser state jenjang nung Media Certification and Monitoring Committees (MCMC) tentetogo aser parnoki election matongdang sen agüja osang adokba noktangtsü.
State level MCMC nung Chairman ji CEO lir aser onoki taila osang aser candidate indang advertisements mita reprangtsü. Nisungtemi model code of conduct alema meinyaktsü aser election expenditure sen lakh 70 dak tema meindoktsü atema mita reprangtsü, ta Sahu-isa metetdaktsü.
Matamabensartemi PWD App ka download asütsü akok aser election personnel-i parnok ki tonga oa voters list nung tenüng züluoktsü mepishir, ta paisa shisem.