Assam Regiment-i 1971 rara nung tasürtem bilemtet

Jammu, June 12 (Agencies) : 1971 India-Pakistan rara nung Assam Regiment-i tasütait mapa inyakba bilemteta Chhamb-Akhnoor theatre nung Deobarnü Indian Army tongti ketdangsertemi parnok nem tetushi agütsü.
“Iba mapang Deputy Chief of Army Staff & Assam Regiment Colonel aser Arunachal Scouts, Lieutenant General Subarata Saha, aser 1971 war veteran Major General P.K. Puri (retired) nati Rakhmuthi nung aliba 5 Assam Regiment war memorial nung naro yuja tetushi agütsü” ta Northern Command nung Colonel S.D. Goswami-i metetdaktsü.
Iba anogomung tenüng nung Mandiala nung Akhnoor sector nungi motorcycle expedition ka tenzüktsü.
1971 rara nung mapa tajung inyakba atema Assam battalion nem Jammu & Kashmir nung Battle Honour for Chhamb & Theatre Honour naroküm agütsü.
1971 küm Pakistani sepaitemi heavy armour amshia 5 Assam sepaitem amak. Ajisüaka, iba unit nung tasütait lennirtem aser sepaitem aliba ajanga Pakistan-iAkhnoor bridge makdoktsü merangba noktangtet, ta Army sangdong ka nung metetdaktsü.
“Pei tetsü tasoli kümzüktsü merangdang Assam Regiment nungi ketdangser 5 aser sepai 19-i taküm bendanga agütsü” ta sangdong nungsa shia lir.
1971 rara nung Battle Honour anguba infantry battalion ji Assam Regiment dang lir.