Assam Rifles-i Dimapur nung medical camp ayongzük

Dimapur, March 9 (TYO) : 181st Raising Day kübok shilem ka ama 32 Assam Rifles-i Dimapur nung angati medical camp ka ayongzüka agi.

Iba sentong ya DDSC stadium nung agi aser nisung aika temang reprangdaktsü.

Home minister Y Patton-i iba sentong lapokdaktsüdang Assam Rifles nem tenüngsang agüja jembi.

Dimapur aser temeket aliba tesemtem nung alirtem asoshi medical teyari agütsüba atema Y Patton-i pelaba metetdaktsü.

‘Friends of the Hill People’-i iba sentong ayongzüka agiba ajanga parnok asenok meimba aser aria bilemtsüba indang sayur. Assam Rifles-i yimjung aser tesünep atema tasü itta raraba dang masü saka iba mapa ajanga parnoki asenok jangratema alitsü aser temang anema alitsü atema bilemtsüba sayur, Home Minister-isa ashi.

Ibala health camp ya state sorkaria ayongzüka agitsüla aser ibaji ajanga state nung temang anema alibaren jenjang tajungba akümtsü. Asen lokti nung teyari peria mangurtem yaritsü atema Assam Rifles-i inyakba mapa nung state sorkari maneni nungita yaritsü, ta paisa shisem.

Iba sentong agiba sülen Y Patton-isa Assam Rifles-i lapokba facilities centre semdang aser pai sen lakh jenjang mozü tenla agütsü.

Iba camp nung District Hospital Dimapur, Zion Hospital, Assam Rifles aser Homeopathy Doctor aser medical ketdangsertemi shilem agi.