Assam Rifles-i Dimapur nung prangpong-injang shibelenertem apu

Dimapur November 12 (TYO) : November 3 nungi 5, 2015 tsüngda 37 Assam Rifles-i Dimapur nung Khehoi village, 5th Mile aser Super Market tesemtem nung mita aodang prangpong 5, injang tapu balala round 153 aser NSCN(R) züngsem 2 den prangpong-injang shishilembar pezü apu, ta sangdong ka nung metetdaktsü.
November 3 nü Khehoi Village anasa ki ka nung prangpong-injang shibelener ka anenzüka lir ta osang tejangja angazükba sülen 37 Assam Rifles aser 32 Assam Rifles telok kati mita aodang Khetoho Aye ta ser nisung ka apu, ta Assam Rifles sangdong nung shia lir.
Pa ket nungi Point 22 Rifle ka, Point 303 Rifle ka aser injang round 143 bena aliba apu.
Ano, November 4 nü Chumukedima tesem nung tashiyim agi sen saruba osang angazükba sülen 37 Assam Rifles-i bushitepa aodang NSCN (R) züngsem ta temulung melemi bilemer nisung ana apu aser tenaji Lieutenant Akavi Chophy aser Mughato Achumi na lir, ta sangdong nungsa shia lir.
37 Assam Rifles-i tasembuba mapa inyakbaji November 5 nü liasü. 7th Mile, Chumukedima nung prangpong-injang shilebenba mapa inyaktsü ta osang tejangja ka angazükba sülen sepaitemi parnok aputsü atema bushiteptsü tenzük.
Sepaitemi 7th Mile anasa temulung melemi bilemer nisung ana angu aser tena sülen anidakba sülen Super Market, Dimapur anasa Athrongse Anar aser Aripa Yeps na apu, ta AR sangdong nungsa metetdaktsü.
Tena ket nungi prangpong ka ngutet aser tena dang asüngdangya asüdang, tena Chumukedima/ Dimapur nung prangpong yokdoktsü atema aruba liasü ta nangzük. Ano tena indang prangpong ka Purana Bazaar nung yua lir ta angazükba sülen sepaitemi ibajia ngutetogo.
Sepaitemi kanga junga mitba aser nisungtem apuba ajanga Chumukedima/ Dimapur nung ozüng anema prangpong-injang shibelenba maparen azüokogo aser iba ya ajanga iba tesem nung tensa tajungba kümogo, ta Assam Rifles sangdong nungsa metetdaktsü.