Assam Rifles-i GPRN/GPRN züngsem ka kashet

Dimapur, October 23 (TYO): Deobarnep Wokha kübok Okotso yimtsüng anasa arem nung 28 Assam Rifles aser GPRN/NSCN tsüngda kahtepdang GPRN/NSCN züngsem ka kahset aser AR jawan dena nisung ana yiru.
Tasüsangji Chungtia nunger Leut. Imli liasü ta jangjaogo aser yirua alisangji Chipemo Tungoe lir.
Sorkar den ceasefire aser ground rules yanglua liaka, Assam Rifles-i Naga Army amakba ya tasümait mapa ka lir aser onok raratsü ajungmesoba lir. Iba ama mapa inyakba atema ‘friends of the hilly people’ ta ajar temi kuli kecha magütsütettsü, ta GPRN/NSCN, MIP-i sangdong ka nung metetdaktsü.
GOI aser GPRN/NSCN tsüngda ground rules yanglua aliba akhümtsübua, Naga Army section ka, temapurtemi ashiba ama parnok aliba tesep toktsür designated camp-i aodang, Assam Rifles-i ceasefire ground rules anema parnok len tom nung amak, ta MIP sangdong nungsa shia lir.
Tenemlem alirtem asoshi medemertem ta ajartemi uniform agir ozüng alema mapa inyakra, Naga Army-ia parnok nem telangzüba tajung agütsütsü. Parnok nübo teimba mesüra prangpong-injang tajungba amshir ta sür AR nem Naga Army amokbanga meyudaktsütsü. Assam Rifles mesüra tanga force shinga nema ozü züngsemtem metepsetdaktsütsü ta GPRN/NSCN-i Assam Rifles dang metetdaktsür, ta sangdong nungsa shia lir.
Nagaland nung alirtem asoshi yimten telemtetba tajung ka agitsü atema telok balala tsüngda ceasefire alitsü nangzüktepa lir. Iba ama tensa ka nung Assam Rifles-i Naga nungerji ozüng alema mapa inyakba aser tashiyim amshiba ajanga koktettsü ta bilema lira, Naga Army-ia parnok nem kasaji meyiptsütsü. Iba tatalokba atema Assam Rifles-i tatok meshitsüla aser parnoki pua bener aoba prangpong-injangtem tekaratiba nung meyiptsütsüla, ta GPRN/NSCN-isa metetdaktsü.
Assam Rifles nung ketdangsertem aser sepaitem dang ‘ceasefire ground rules’ aser ‘rules of engagements’ angateta sayutsüla. Tesüiba mapangtem nunga Assam Rifles-i konang dang nungibo maaksü ang teimba nguteta lir aser ibaji Naga nungeri kanga junga meteta lir, ta parnokisa shisem.
Ano külen, Assam Rifles sangdong ka nung ashiba agi, Okotso anasa telungpur aika lir ta osang tejangja kar angazükba sülen October 22 aonung parnoki telungpurtem anema mapa ka tenzük.
Sepaitemi telungpurtem bushiyonga aodang, Okotso nungi kilometer asem shi pilar telungpurtem aika temulung melemi bilemba tesep ka nung aliba bushitet, ta sangdong nungsa shia lir.
Sepaitemi telungpurtem dang kümdangtsü osang sangoktsü saka parnoki meyiper injang kahloktsü. Idangji parnoki AR jawan ka yirutsür jena aotsü merang saka sepaitemi parnok den kahtepdang GPRN/NSCN züngsem ka kahset aser ka yirutsü. Teyirusang nem idangjisa first aid agüja anepalu aser iba sülen Civil hospital, Wokha-i anir ao aser police ket nung agütsü, ta Assam Rifles sangdong nungsa metetdaktsü.
Yirua alisang jagi parnok NSCN(KN) telok nungi lir ta osang tejangja ashi. Ceasefire ground rules ajanga telungpurtem prangpong bener senzütsü memelar. Iba tesem nungi AK-47 rifle ana, 12 Bore rifle ka, point 303 rifle ka, G3 rifle ka, point 22 mm rifle ka aser injang aika ngutet, ta sangdong nungsa shisem.