Assam Rifles-i JNB telungpur ana kahset

Haflong, September 22 (Agencies): Assam tiyong nung aliba Dima Hasao district nung Mongulbar nü Assam Rifles aser tan tasen kümtetba Jabinkhe Naiso Boshom (JNB) na kahtepdang JNB telungpur ana kahsetogo.
Osang tejangja angashiba sülen Assam Rifles-i Langting police station kübok aliba Lungting aser Hatikali na yongtsü arem min nung JNB telungpur atsüka aliba tesem nung operation agia liasü, ta Assam Rifle ketdangser kati ashi.
Assam Rifle tem telungpur atsüka aliba tesem anasa atongdang parnok ajentsü meranga injang mashi mashi akahtsü tenzük. Anungji sepaitemia kahtepdang telungpur ana kahset aser ka jena ao. Iba tesem nungi AK-56 rifle ka, barrel ka aliba rifle asem aser air gun pistol ka ngutetogo, ta AR ketdangserisa shisem.
Paisa ashiba agi, tasürtemji Laden ta ajasang, Hamsen Ardao aser Mukhesh Porbosa ta ajasang Maisa na liasü ta jangjaogo aser iba tesem nung ano maneni jena aosangji bushidar. Bilemba agi jena aosangjia injang agi yirur alitsü südi. Item telungpur otsü ya tawa ang metetpelatepa liasü aser ashiba agi joko ita ishika parnoki Dima Hasao nungi maparen ajak inyaker.