Assam Rifles-i Kilonser ki mitba aitsür : GPRN/NSCN

Dimapur, December 20 (TYO) : Assam Rifles-i mapang shia GPRN/NSCN züngsemtem ki mitba atema mepelar. Ozü züngsemtem aser kibongtem timtemdaktsüba inyakyim anentsü atema aiben shiogo saka Assam Rifles-i iba inyakyim mazüoker, ta Ministry of Information & Publicity, GPRN/NSCN sangdong ka nung metetdaktsü.
Tawa tu Assam Rifles-i Deputy Kilonser of Law & Justice, GPRN/NSCN, Imyapanga Ao’er kibongtem reshikangshi. Kilonser ket nung .32 hand gun ana lir ta asüba dak alaka tanga kuli kecha melii dang AR-i anepdang 3:30 ako nung par ki mittsü tenzük aser ghonda ka ser tesadang ka tashi ki aser osettsüset ajak kakpoka reprang, ta MIP, GPRN/NSCN sangdong nung metetdaktsü.
Iba mapang Assam Rifles-i Kilonser kinungtsü mang dena mit aser ibaji Ceasefire ground rules alema inyakba mapa lir. Kecha mongutetaka parnoki mapang talangka ki mita reprang. Assam Rifles-i mebilemdangi aser shisa makai inyakba mapatem atema aiben GPRN/NSCN-i ola adokogo saka parnoki inyakyim memetongshir, ta sangdong nungsa shia lir.
Mapang shia ki mita aoba aser mebilemdangi inyakba maparen ya Ceasefire ground rules alema inyakba dang masü saka raratsü ajungmesoba ama lir. Anungji GPRN/NSCN-i AR bangdakpur dang pei sepaitem nem ceasefire ground rules angatetdakjang ta sangdong nungsa metetdaktsüogo.