Assam Rifles-i mapangshia ki mita aoba aitsür: GPRN

Dimapur, Tsüklai (February) 08 (TYO): Tsüklai (February) 07, 2018 anogo nung Assam Rifles sepaitemi Chumukedima nung Naga Army, Colonel Temjen Ao’er ki anepongi 1:00 ako nungi 2:30 ako tashi mita reprangbaji GPRN-i sashia aitsür; AR team jagi ki mejungi raksatsü, iba den külemi iba mapang nung kidang alir tanurtem atema-a mebilemtsüi inyak, ta GPRN Ministry of Information and Publicity sangdong ka ajanga metetdaktsü.
Ano Aenjeti (January) 19, 2018 nü 42nd Assam Rifles sepaitemi Tenyiphe 2 village, Chumukedima nung Member of the Steering Committee, Teputhe Angami’er ki anepongi 12:00 ako nungi 1:30 ako tashi mita reprangbaji GPRN-i sashia aitsür; küm ana tsüngda AR team-i tan agi pezübenbuba par ki mita reprangogo. AR team-i kibong züngsemtem dang masü saka anasa aliba yimertema shisatsü nung amokmerenogo, ta kasa sangdong nung shia lir.
“AR team-i tajemdakdak makai mita aoba ajanga India sorkar aser NSCN na tsüngda sign asüba Cease-Fire Ground Rules nung Clause (a) ozüng alema inyakogo. Assam Rifles-i temzüng ozüng tensa nung ajemdaker maneni ki mita aoba ajanga Nagalim nung tzüzüng-ozüng tensa tamajungba kümdaktsüogo aser maneni NSCN aser Naga nunger dang mejungi benshiba jungkai adoka sayuogo,” ta sangdong nung shia lir.
“GPRN-i Assam Rifles mapa tamajung asadangba den külemi küm 60 dak tema indang Indo-Naga ken o bentettsü atema NSCN den yimjung ken o jembia aruba India sorkar dang tasüngdangba akar. Anungji Cease-Fire Ground Rules akhümket wazüka ayutsü atema aser tesünep nung yimtenren ken o jembitettsü atema Assam Rifles aser India sorkar ketdangsertemi, yimjung ken o jembiba raksatsüsa mapang shia ozüng alema inyaker Indian Army sepaitem nem temerenshi agütsütsü akok. Maneni item ama mapa inyakra Naga Army-ia inyaktsüsa akumtsü, aser iba khuretji India sorkari abentsü,” ta kasa sangdong nung metetdaktsü.