Assam Rifles-i Mizoram nungi Myanmar senso 135 meyipa yok

Aizawl, July 3 (Agencies): Assam Rifles-i Myanmar nunger refugee 135 tashi par linüki meyipa yokogo aser parnok nem anogo 15 nü atema ration agütsü ta Mizoram district ketdangser kati ashi.
“Mongulbarnü Assam Rifle sepaitemi Myanmar nunger kibong 54 nungi züngsem 135 tashi parnok linüki meyipa yokogo. Onoki parnok nem anogo 15 nü atema ration agütsü” ta Lawngtlai district Deputy Commissioner Shashanka Ala-i ashi.
November 2017 nungi Mizoram kübok Lawngtlai district nung yimtsüng pezü nung Myanmar refugee 2019 liyonga arur. Myanmar kübok Arakan (Rakhine) state nung kin o kin tsüngda meputep adokba sülen parnok Mizoram nung arua jenok, ta Ala-i metetdaktsü.
Refugee 219 nung tanur aser tetsürtem dena lir. Parnok 84-i parnok sasa molungteta Myanmar-i meyipa ao aser Mongulbarnü Assam Rifles-i Myanmar senso 135 meyipa yok, ta laisa shisem.
Mizoram Home Department nung ketdangser kati ashiba agi refugee temi Myanmar nung parnok lendong ajurutsü ta tsübuba agi meyipa aotsü nungnanga liasü.
“Union Home Ministry-i tawa tu Mizoram sorkar dang refugee tem tekaratiba nung meyipa yoktsü atema tetuyuba agüja liasü” ta ketdangserisa ashi.