Assam Rifles-i nisung 2 apu

Dimapur, August 28 (TYO) : 37 Assam Rifles-i August 19 aser 23, 2016 anogotem Chumukedima aser Thahekhu (Dimapur) nung mapa ana takok ngua inyakogo, ta sangdong ka nung metetdaktsü.
Iba mapang sepaitemi NSCN (IM) züngsem ka aser prangpong-injang shibelener ka apum, ta Assam Rifles sangdong nung shia lir.
August 19 nü Sukhovi Road, Chumukedima nung sepaitemi mita aodang nisung ka apu aser pa ket nung Point 22 Pistol ka den injangtem bena lia apu.
Iba nisungji Tuensang nung Loyam Chang ta jangjaogo aser pai prangpong-injang shibelenba mapa inyakba nangzük. Pai Sukhovi Road nung nisung ka dang yokdoktsü atema jembitepa liasü ta paisa nangzük, ta AR sangdong nungsa metetdaktsü.
Loyam Chang aser pa den apuba prangpong-injangtemji August 19, 2016 nü Diphupar Police Station ket nung agütsü.
Dimapur kübok Thahekhu area nung NSCN (IM) züngsem ka prangpong-injang bener lir ta osang tejangja ka angazükba sülen August 23 nü 37 Assam Rifles aser 32 Assam Rifles-i iba tesem mita ao.
Sub Urban Police Station nung police tem dena temulung melemi bilemba ki ka mita aodang point 22 Pistol ka, injang aser NSCN (IM) indang taitsü aketba kulikakettem angu. Iba kidang nungi Albert Mao ta ser nisung ka apu.
Pa ya NSCN (IM) nung ‘Leacy’ liasü aser pa den külemi apuba osettemji kasa anogo nung Sub Urban Police Station, Dimapur ket nung agütsü, ta AR sangdong nungsa shia lir.