Assam Rifles-i NSCN (IM) züngsem ka apu

Kohima, Chiteni/July 11 (TYO): Assam Rifles aser Nagaland Police na senteper July 9 nü Dimapur District kübok 5th Mile nung BOC anasa NSCN(IM) züngsem ka puogo.
Iba tesem nung telungpur ka munga aliba osang angazükba sülen sepaitemi iba tesem meita aoba mapang NSCN(IM) nung SS Leacy ka apu. Parnokisa pa ket nungi Point 22 mm Pistol ka den injang pongu nguteta liasü.
Tenüngpursang den pa ket nungi apuba prangbong injang ya Diphupar Police Station nem bendanga agütsüogo aser maneni ken o bushitsüngdangtsü.
Kasa mapang nung Assam Rifles sepai temisa, July 10 nü Kohima District kübok Chedima yimtsüng anasa prangbong injang aika ngutetogo.
Itangitertem nungi prangbong injang rizünga aliba osang angazükba sülen sepaitemi iba tesem meita ao. Bushitsüngdangba mapang sepaitem ali telung nungi pranbgong injang aika tuteta liasü.
Parnoki 60 mm Mortar bombs asem, M-60 Anti-Tank Rifle Grenades ana, 7.62 mm Sniper injang 390, 7.62 mm AK-47 injang 109, 7.62 mm Pistol injang 51, PEK (explosive) seret asem aser AK-47 magazine ka ngutet.
Parnoki ngutetba hadirtem ajak North Police Station, Kohima nem bendanga agütsüogo, ta PRO (Defence), Lt Col Sumit K Sharma-i sangdong ka ajanga metetdaktsü.