Assam Rifles-i NSCN (K) Defence Secretary apu

Dimapur, June 4 (TYO) : June 1, 2016 nü 37 Assam Rifles aser 33 Assam Rifles külem telok kati Dimapur District kübok Molvom tesem nung Kughato Chishi ta ser NSCN (K) nung Defence Secretary ka apu.
NSCN (K) züngsem Kughato ji Jharnapani-Molvom lenmanglen senzür ta osang tejangja ka angazükba sülen sepaitemi pa aputsü mita atar apu, ta Assam Rifles-i sangdong ka nung metetdaktsü.
Kughato dang asüngdangya asüba mapang pa NSCN (K) nung Civil Wing züngsem ka lir ta nangzük. March 2016 nung NSCN(K) Finance Secretary, Brigadier Akaho Jumah-i tetuyuba agütsüba ama pa Dimapur nungi Kohima-i ao. Kohima nung sorkar department tem dang nungi tashiyim agi sen sarutsü atema pa nem mapa lemzüktsü ta pai ashi, ta AR sangdong nungsa shia lir.
Pai, sorkar department balala nem hopta ana tsüngda mapa inyakertem itasen nungi noklang nung shilem 24 agütsütsü atema tezülubatem agütsü ta paisa nangzük. Ano, pa nemsa NH-29, Kohima nung Manipur leni aoba truck garitem nungi sen sarutsü atema mapa lemzüktsüba shiogo, ta AR sangdong nungsa metetdaktsü.
March 2015 nü NSCN (K)-i India sorkar den ceasefire tenangzüktep agien aser tang iba telok ya ozüngi noktanga lir. Tesüiba küm ka tsüngda iba teloki ozüng alema mapa aika inyakogo, ta Assam Rifles-isa metetdaktsü.