Assam Rifles-i NSCN-K osang madoktsü tuyur

Kohima, October 31 (Agencies) : Osangkakettem nung NSCN (K) nungi aruba sangdong adoktsüra ibaji ozüngi memelaba telok pusema nungitba ama züngshitsü, ta Inspector General of Assam Rifles (IGAR-North)-i metetdaktsü.
Ministry of Home Affairs-i Unlawful Activities (Prevention) Act 1967 kübok NSCN (K) ji ozüngi memelaba telok ta züngokogo, anungji NSCN (K)-i akhangba indang osang sangdongba ocettemji Unlawful Activities (Prevention) Act 1967-i memelar, ta Colonel Rajesh Gupta, IGAR-i sangdong ka nung metetdaktsü.
Nübo tasen shimba noktangtsü, azütokshi aser kiralongraba mapa anendaktsütsü nükjidong nung NSCN (K) ji Unlawful Association ta züngok. Tawa tu MIP, NSCN (K)-i Nagaland sorkar nung yimsüsür kar amokmerena sangdong aser parnoki shimba nüboi saru sarutsü osang metetdaktsüogo. Anungji NSCN (K) nungi aruba osangtem media ajanga madoktsü tetuyuba agütsür, ta IGAR-isa sangdong nung shia lir.