Assam Rifles-i NSCN(K) aser FGN züngsem ka ka apu

Dimapur, September 21 (TYO) : September 16, 2016 nü Mon jila kübok New Site nung 33 Assam Rifles-i mita aodang NSCN (K) Sergeant ka apu.
Paji Mokokchung kübok Akhoya nung alir Imli Meren’er jabaso Rongsen Temjen Ao lir ta jangjaogo.
NSCN (K) telok ka Nagaland-i aruba rongnung pa dena liasü aser parnoki Indian Security Forces anema mapa inyaktsü atema tetuyuba agütsü ta pai ashi, ta AR sangdong ka nung metetdaktsü.
NSCN (K) züngsem apuba ajanga parnok teloki ozüng alema mapa inyakba nung tetsükdaktsü ajurutsü. September 17, 2016 nü Rongsen Temjen Ao ji Mon Police Station ket nung agütsüogo, ta sangdong nungsa metetdaktsü.
September 19, 2016 nü 44 Assam Rifles-i Longleng District kübok Oushok yimtsüng nung FGN Captain ka apu, ta tanga sangdong ka nung metetdaktsü.
Iba nisungji arishi küm 28 tain Captain B Chingi Phom lir aser paji Bhukta Phom’er jabaso ta jangjaogo. Pa ya 2006 küm FGN nung aden.
Pai Longleng district nung FGN tenüng nung tashiyim agi sen saru ta nangzük. Pa ket nungi AK-47 Assault Rifle ka, magazine 3 aser rounds 48 den taitsü aketba kulikakettem kar apu.
Longleng District nung tashiyim agi sen saruba khuret agientsü atema mapa tajung inyakba atema Longleng aser Oushok nung alirtemi Assam Rifles dang pelaba metetdaktsü, ta AR sangdong nungsa shia lir.