Assam Rifles-i ozüng agütsüba khen mamshi atatsü

Guwahati, December 11 (Agencies) : Assam Rifles-i Nagaland nung press temeten anema tetuyuba ka agütsüba ken o Press Council of India-i angadangba sülen, iba tetuyuba khen mamshii atatsü telemtetba agütsüogo.
Honibarnü Guwahati nung Press Council of India-i Yimozülurtem, Nagaland state sorkar aser Assam Rifles nungi teshimtet nisungtemi ashiba onüktem angaba sülen Assam Rifles-i iba tetuyuba khen mamshii atatsü lemtetsü.
October 24, 2015 nü Assam Rifles-i tetuyuba agütsüba aser iba atema Nagaland osangkakettem nung anogo ka yimozülur tapak tazüngla adokba osangtem angashidang Press Council of India-i kanga süoki ia bilem, ta PCI Chairman, Justice C K Prasad-i ashi.
Iba jagi Council-i “Unlawful Activities (Prevention) Act, 1967” kübok Assam Rifels-i Nagaland Newspapers nem tetuyuba agütsüba ken o angadangtsü telemtetba agi, ta Justice Prasad-isa ashi.
Council-i Yimozülurtem, Nagaland State Sorkar aser Assam Rifles-i ashibatem ajak angadangogo aser iba mapang Assam Rifles tenüng nung adenertemi October 24, 2015 nü tetuyuba agütsüba khen mamshii atatsü ta ashi, ta PCI Chairman-isa metetdaktsü.
Linük taginüba atongtsü aser Press nüjiso wazüka ayutsü tangatetba nung Yimozülurtem, Nagaland State Sorkar aser Assam Rifles tsüngda ken o angatetteptsü atema tanü tadenertem ajaki mulunga agizük,
“Parnoki Press Council of India nem parnok telemtetba agiba osang sangoktsütsü. Iba ken o tembangogo aser iba atema onok pelar. Onoki Press nüjiso wazüka ayuba den linük taginüba ama inyaka aotsü imlar” ta Justice Prasad-isa ashi.
Tanü senden nung Assam Rifles-i parnok nem agüja aliba tashi alia inyakba angateta aru aser parnokisa media dang osangtsüsang belenshiba atema pelaba metetdaktsü.