Assam Rifles-i prangpong-injang shibelenertem apu

Dimapur, September 18 (TYO) : September 12, 2015 nü 37 AR aser 32 AR nungi sepaitemi Diphupar nung mita aodang Hanto ta ser nisung ka ket nungi Point 22 Automatic Pistol aser injang bena aliba apu, ta Hokolbarnü Assam Rifles sandgong ka nung metetdaktsü.
September 14 nüa kasa mapa inyakdang 37 Assam Rifles-i New Chumukedima Village nung Kauobeizo Angami apu. Pa ket nungi Point 22 Rifle ka, 12 Bore Gun ka aser injang round 49 ngutet, ta sangdong nungsa shia lir.
Item nisungtem yagi prangpong-injang shibelener ta osang tejangja angazükba sülen sepaitemi mita aodang apu aser iba ya ajanga Chumukedima/ Diphupar tesemtem nung prangpong-injang yokyayokjiba mapa inyakba jungkai adoka sayur, ta AR sangdong nungsa shia lir.
Ano, September 10 nü 32 Assam Rifles-i Dimapur District kübok Ghokuto yimtsüng nung ki mita ao.
Iba yimtsüng nung ozüngi memelaba prangpong-injangtem yua lir ta osang tejangja angazükba sülen Assam Rifles sepaitemi mita aodang ki ka nungi Point 22 Rifle ka, 12 Bore Gun ka, Point 22 Pistol ka aser Point 22 injang round 2 yua aliba angu, ta AR sangdong nung metetdaktsü.
Iba ki kiburji G Sikavi Zhimomi lir aser pa ya Head GB aser Ato Area GBs’ Association nung tir inyaker. Sepaitemi par ki mita reprangdang pa kidang maliasü ajisüaka Nuiland Police station nung pa anema ken o ka benokogo aser prangpong-injang apuba ajak police ket nung agütsüogo, ta AR sangdong nungsa shia lir.