Assam Rifles-i Sihai Khunou tensa raksatsü: NSCN

Dimapur, April 30 (TYO): Küm 21 tema India sorkar aser NSCN tsüngda yimten tebilemtsü atema jembia arur aser joko telemtetba ka agitsü mapang ka nung Ukhrul district kübok Sihai khunuo nung tang tensa ajurua aliba atema kanga sasa bilemer, ta MIP-i ashi.
Indian security force-i iba mapa inyakba ajanga timtem ajurutsü aser iba inyakyim ya Ceasefire Ground Rules tangatetba alema lir, ta parnokisa ashi.
June 8, 2018 nü Chumukedima, Dimapur nung tatemsabuba Ceasefire Ground Rule Review Committee senden amendang India sorkar tenüng nung Rina Mitra, Special Secretary (IS) aser NSCN tenüng nung Lt. Gen. (Retd.) V.S. Atem nati anir adendang telok anapronglai tensa tajungba kümdaktsütsü aser August 3, 2015 Framework Agreement akhümtsübutsü mulunga agizük.
Iba tangatetba nung NSCN-i inyaksangshia arur saka Assam Rifles-i Ceasefire Ground Rule alema NSCN ajemshir. Ceasefire Ground Rules mashileni angateta inyaksangshiyonga, angatetteptsü atema sabang ka lir. Anungji AR-i yimdaklirtem dak jenoker raratsü memerangi CFMG dangi ken o abentsüla asü, ta MIP-i metetdaktsü.
Tang ya aluyimba mapang ka lir saka sepaitemi yimtsüng makbanger lir.
Ukhrul District kübok Designated Camps ya tang tasen masü. 2007 küm taoba CFMG Chairman Gen. Kulkarni-i Khangkhui-Shirui forest area designated camp lemzüktsü aser 2009 nung iba camp toktsü. 2010 küm Maj. Gen. Gurung den Chatric aser Grihang nung camp atema angatettep. Tawa Chatric camp ya designated camp masü ta ser azüngtetdaktsü aser tang Sihai Khunuo camp dak tenük yoker.
Iba camp ya ‘designated camp’ ka masü saka iba camp ajanga tensa mejungi kümdaktsüba osang kecha mali aser temeket aliba yimtsüngtemia iba kuliji agütsütsü.
March 1, 2019 nü CFMG senden nung IGAR nungi Col. Joshi GS-i Ukhrul District nung designated camp kecha mali ta ashiba ajanga ceasefire ground rules mangatettba sayur. Assam Rifles B. Range (10 Sector, Brigade)-i Sihai Khunou nung tensa raksatsübaji tim masü. Iba tesem nung tensa mejungi akümer asü nungji CFMG Chairman-i tensa süngjemdaktsütsü atema NSCN züngsemtem alitsü tesem ka lemzüktsütsüla.
Kashmir ama tensa ka kümdakjaka Ukhrul District ya Kashmir masü ta onoki jangjashitsür. Helicopter asem den drone ajanga NSCN camp mita anüker aser prangpong-injang tasentem ajak bener arua longpanga lir. Iba ya yimdaklirtem tsübudaktsütsü aser aoksadaktsütsü atema inyakba mapa ka dang lir, ta MIP-isa ashi.
NSCN ya kiralongrar telok ka masü anungji yamai prangpong-injangtem bener arua sayuba aser Paramilitary Commando tem yokba ya nüngdak mali. Küm 21 tashi ceasefire liyonga arudang yimten olemtep maparen tajungba inyaktetogo anungji Assam Rifles-i NSCN züngsemtem dak tenük yoka arshiba ya tim masü, ta parnokisa shisem.