Assam Rifles-i tetsür chanu nem shisaliok agütsütsü: ARWWA Tir

Kohima, May 22 (TYO): Security mapa inyakba dak alia mera tasen ka agia Nagaland nung 5 Sector Assam Rifles-i tanü “Beti Bachao, Beti Padhao’ campaign nung ajemdaker tetsür chanutem shisaliok atema teyari agütsütsü, ta sangdongogo.
Tanü Kohima nungi kilometer 15 shi pilaa oor Tsiese Basa yim nung tetsürtem den shisa lemsatepdang 5 Sector Assam Rifles Commander kinüngtsü aser Assam Rifles Wives Welfare Association (ARWWA) Tir, Amardeep Bains-i, “5 Sector Assam Rifles-i tetsür chanutem primary aser secondary level shisaliok atema pelashishia yaritsü, iba den külemi lenla tapu balala nung tetsürtem nem skill training maongka agütsüba ajanga tashi itdaktsütsü,” ta ashi.
Lai ashiba agi, Assam Rifles indang, ‘Friends of the Hills People’ ama liteta 5 Sector AR-i Centre sorkari benokba ‘Beti Bachao, Beti Padhao’ ajanga yimtak tetsürtem aser tetsür chanutem taküm nung temelenshi kadaktsüner.
Laisa ashiba agi, 5 Sector AR-i AR school nung sector kübok angati primary shsaliok agütsütsü aser class 10 aser 12 zünger ano temaba nung züngner nüngdakbapur tetsürtem nem scholarship agütsütsü.
ARWWA Tirisa, yimtak tejangrar tetsürtem nem 5 Sector Assam Rifles aser 9th Assam Rifles nung knitting, embroidering, tailoring, parlour aser computer basics traning agütsütsü, ta metetdaktsü.
Tanü iba sentong nung 9th Assam Rifles CO kingtsü, Meenakshi Tyagi aser 9th AR 2nd in Command, Shyamal Paul nata liasü.