Assam Rifles indang Director General-i o meshidak jembi: NSCN/GPRN

Dimapur, Aenjeti/January 06 (TYO): The Week magazine den sensaksemba mapang Assam Rifles indang Director General, Lieutenant General, Pradeep Chandran Nair ajanga jembiba o angashia süngmanger aser kasaji The Morung Express nung January 6, 2022 adok nung adoka lir, ta NSCN/ GPRN sangdong ka ajanga ashi.

Iba sensaksem nung Assam Rifles indang Director Generali “Niki Sumi den par nisungtem bendanga agütsüba sullen tangbo tashi mait kumogo” ta shia lir.

Director General-i kechiba “surrender” ojang amshi, ibaji jangjatsütsüla, kechiaser ibai khenyongi tiazü lir, ta NSCN/ GPRN ajanga ashi. September 8, 2021 nü GoI aser NSCN/GPRN tsüngta ceasefire atsülangshir aliba meteta liaka iba ama tashi aser jenjang aliba nisung kati komaser iba ama sangdong tiazü agütsür, ta sangdong ajanga asüngdanga liasü.

Pai metetsümonga nüburtem rongnung rongrong adokdaktsütsü, mangmangdaktsütsü aser mangatetep adokdaktsütsü meranger ta ashitsü akok, kechiaser alima nung kecha sorkari temai adoker aliba telok den ceasefire meyanglutsü, ta ashi.

NSCN/GPRN ajanga koma sür aser kechiba ceasefire ya atsülangshiar Government of India-i kanga junga meteta lir aser nüburtemi yimjung aginüba ama NSCN/GPRN-i angar ta ajaki meteta lir aser yimjung maparen nung Centre den külemi inyaker aser 2015 küm yutsür aliba ceasefire agreement tanaben yanglushia lir, ta sangdong ajanga ashi.

Naga nübur temeden atema raraba nung NSCN/GPRN-i kodanga surrenden masü aser tarutsü anogotem nunga kodanga masütsü.

Lieutenant General, Pradeep Chandran Nair-i tiazü sangdong agütsüba atema NSCN/GPRN ajanga khukhua aitsür aser pai iba sangdong meyipa agitsüla, aji mesüra pai tamendak dak maka iba ama sangdong agütsüba nungi tarutsü nung timtem ajurua pa khuret asütsü, ta ashi.

Maneni NSCN/GPRN ajanga Director General dang NSCN/ GPRN ajanga temai adoktsü (surrender) atema meyongnem agütsüba mesüra molungba kuli kar danga lira ibaji sayuang/ agüjang, ta ashi.

Mitkar lenir kati sangdong meputep agütsüba atema Government of India aser Ministry of Home Affairs ajanga metetjema alitsü tim, ta NSCN/ GPRN sangdong ajanga ashi. NSCN/GPRN ajanga Indian security forces den ceasefire agreement balaka yanglutsü nüngdak asü? ta maneni asüngdanga liasü.