Assam Rifles puri NSCN(IM) telungpur asem apu

Dimapur, Monupii (May) 4 (Agencies): HQ IGAR (North) kübok Assam Rifles, Medziphema aser Dimapur Battalion puri osang tejangja ka angazükba sülen police den külemi Monupii (May) 3 nü Dimapur kübok 5th Mile, Diphupar nung tesemtem mita aoba sentong ka ayongzüka kaogo, ta ketdangser sangdong ka ajanga metetdaktsü.
Parnoki temulung melemi bilemba ki ka mita aoba mapang nung NSCN(IM) pur asem ozüng alema pronagbong, injang aser tashishitsü aketba kuli kakettem bener puogo. parnok asem ya; Ukhrul district kübok Mapum yimtsüng nung alir asür Ngamranme’er jabaso SS 2nd Lt Wungbam Zimik (29), Myanmar, Lahe District kübok Tamkho yimtsüng nung alir asür Akhut’er jabaso SS Sgt Maj Lamnei Kon (26) aser Senapati District kübok Sechuba yimtsüng nunga alir asür Lekha’er jabaso SS Lance Cpl Leli Mao (25) ta jangjaogo.
Parnok asem ket nungi 9mm pistol ka den magazine, point 32pistol ka den magazine, 9mm injang ana, point 32 injang ana, AK-47 injang ka, mobile ti aser combat dress jora asem, ta ngutetogo.
Ken o maneni bushisüngdangtsü asoshi parnok asem ya Diphupar Police nung bendanga agütsüogo.