Assam Rifles sepaitemi nisung ana dak azük

Imphal, March 23 (Agencies): Assam Rifles sepaitemi March 21 nikongtsütsü Manipur, Kangpokpi district nung nisung ana dak kanga mejungi azük.
Nisungba ana ya ka Kangpokpi district, T Waichong sub-division nung Songjang Pakang yimtsüng nungi Seitinmang Kipgen’er jabaso, küm 27 tain Lamgoulen Kipgen, aser Saitu-Gamphazol sub-division nung Lhangnomphai yimtsüng nungi Lalpao Kipgen jabaso, küm 26 tain Lunkhomang Kipgen ta jangjaogo.
Tena tang iba tesem nung aliba local CHC mozüki ka nung temang anepaludar. Lamgoulen Kipgen ya Songjang Pakang Youth Club nung tongti zülur lir, aser Lunkhomang Kipgen ya Lhangnomphai yimdak tekolakba lir.
Osang ajanga ashiba agi, tena Kangpokpi jila, IT lenmang, Traffic Point nungi Assam Rifles sepai uniform nung masü parnok 38 shi-i nikongtsütsü 5:30 ako meta pua bener ao.
Tenati ashiba agi, sepaitemi tama tena tenük zübangtsür Yaikongpao yimdak, Yaikongpao UJB School kishi nung azük. Tena mapang aser tesem balala nung chiok, ta ashi.
Kipgen aser Pakang na tepi aser telongpu nung kanga mejungi yirua lir.
38 Assam Rifles sepaitem mapa tamajung anema Kangpokpi district nung aliba lokti balala-i Kuki nunger temzüng ozüng nung aliba ama Kuki Inpi Kangpokpi district okadak March 24 matongdang tatok meshitsü asoshi metetdaktsü. Assam Rifles puri tatok memeshira CSO-i FIR agütsütsü ta amokmerenogo.