Assam RSS tanishiri Citizenship Amendment Bill pela agizüker

Guwahati, January 21 (Agencies): Alima tesem mashii ka nungi Hindu nungertem India nung arua alitsü pelashishia agizüker, ta Assam nung RSS tanishir Ranjit Barma-i ashi.
Citizenship Amendment Bill ajanga Afghanistan, Bangladesh aser Pakistan dak alaka tanga linüktem nungi telok tilatem arutsü memelar.
Onoki iba bill ya linük tenangzükba ka ama posemer aser regional maitsü dang nungi tamangba yimsü tuluba lir, ta Ranjit Barma-isa ashi.
Hindu nungeri timtem ajurua arur aser India ya Hindu nunger ajak talidak ka kümdaktsütsü atema mapa inyaktsüla. Prime Minister-ia taoba ita Assam semdangi arudang kasa tebilemba metetdaktsüogo, ta paisa ashi.
RSS indang kaketshir kongsang ABVP-ia Citizenship Amendment Bill anemertemji Naxal tem aser lokti anemertem lir ta metetdaktsüogo.
Chief Minister Conrad Sangma-i anir Meghalaya nung MDA sorkari iba bill atema Prime Minister den ajuruteptsü atema ao saka majuruteti meyipa aru. Iba ajanga parnoki Meghalaya nung BJP den tesentaktep pilatsü atema tia ka ajurua lir aser Manipur nung NPP unit danga kasa mapa inyaktsü tetuyuba agütsüogo.
RSS-i tekong meranga noktakba ajanga par tongti telok BJP-i Rajya Sabha nung Bill agizükdaktsütsü mesüra Ordinance ka ama renemtsü atema tebilemba lir ta kuli sayur.