Assam RTI & peasants’ activist Akhil Gogoi pua lir

Guwahati, October 02 (Agencies) : Taoba ita UNESCO world heritage, Kaziranga National Park telongtet nung ozüng alema alirtem meintokba mapang telok ajungmesoa lendong agütsüba atema RTI activist & peasants’ lenir Akhil Gogoi Deobarnü Assam police-i pua lir.
Iba lendong nokdangtsü atema police-i injang akah dang nisung ana asü aser aika yiru. Gauhati High tetuyuba nung ajemdaker iba tesem nung ozüng alema alirtem azüngtetdaktsüba mapang lokti tulu jagi police dena rara meso.
Gogoi ya Guwahati nung aliba Krishak Mukti Sangram Samiti (KMSS) office nungi pua anir ao aser iba sülen pa anema case benoka aliba tesem, Nagaon district-i anir ao.
“Pa ya IPC Section 147, 148, 149, 120-b, 333, 307 aser 435 tem kübok apu aser tang pa dang asüngdangyadar,” ta Nagaon Additional Superintendent of Police, H Barman-i osangbenertem dang ashi.
Aluyimertem indang lenir, Gogoi ya taoba ita iba lendong atalokba sülen nungi jenshia senzütsü tenzük. Pai ayongba osangbenertem senden ka temli pa apu. Osangbenertem den senden amenba mapang pai Kaziranga National Park anasa alirtem meintokba mapa nung BJP-i aniba Assam sorkar-i tim mesüi inyakogo ta ashi. Pai pa sasa police dang pa aputsü mepishi.
Iba tesem azüngtetdaktsüba mapang yangji alir nisung noklang aikati police tem parnok mapa meinyaktetdaktsüi nokdanga tensa mejungi akümba ajanga police-i injang akahtsü tenzük.
Assam Forest Minister Pramila Rani Brahma-i, lendong madok tsüngda longkak aitba tesem nung Gogoi-a liasü aser iba lendong ajak ya pai ajungmesoba lir. Gogoi-i iba tesem nung alirtemi parnok aliba tesem mazüngtettsü dangsa state sorkari parnok nem temonok agütsütsüla ta takhangba agüja aru, ta ashi.
Assam Human Rights Commission-i, kodaser nüburtem dak police-i injang akhatsüsa akümar ibaji kanga junga bushidangtsüla, ta state sorkar dang shiogo.